• 2010/06/30

    ءبىر ولەڭ جازباي - [ولەڭدەر]

    ءبىر ولەڭ جازباي

    نەمەسە جيىرما التىمەن سەرتتەسۋ

     

    بەكمۇقامەت نۇردانبەك ۇلى

    ءبىر ولەڭ جازباي ۇيقىم دا مەنىڭ كەلمەيدى،

    بەيمازا ويلار كوڭىلىمدى كۇندە كەرنەيدى.

    شابىتىم ءالى شاراناسى شىلقا  جىرىمدى

    شىرقىراتىپ كەپ بەسىككە سالىپ تەربەيدى.

     

    ءبىر ولەڭ جازباي حالقىمدا ماعان بەۋ دەمەس،

    اقىندىق دەگەن كەۋمەلەپ كەتەر كەۋدە ەمەس.

    شىنشىلدىق اتتى شىڭىراۋ شىڭعا شىقپاعان،

    جۇز ولەڭ جازساڭ جۇرەگىن جۇرتتىڭ ەمدەمەس.

     

    ءبىر ولەڭ جازباي جازىم دا مەنىڭ شىقپايدى،

    شىڭعىرىپ ايتار شىندىقتى جانىم قۇپتايدى.

    اقىن بوپ جۇرگەن ازاماتشالار كەي كەزدە ،

    بوراننان بۇعىپ ، جەل تيمەس جەرگە ىقتايدى.

     

    ءبىر ولەڭ جازباي ءساۋىردىڭ تاڭى اتسىنبا،

    ەي ولەڭ مەنىڭ ومىرىمدى مىناۋ جاتسىنبا.

    اتادان قالعان اسىلىمدى ىزدەپ ارىدىم ،

    كومىلىپ قالعان جەتى قات جەردىڭ استىندا .

     

    ءبىر ولەڭ جازباي وشكەنىم قايتا جانبايدى ،

    ناۋمەسىر جانعا نامىستان گورى نان قايعى.

    قۇلقىنى ءۇشىن قۇل بولعان جاندار بۇل كۇندە ،

    ارىنان اتتاپ ءبىر - ءبىرىن كۇندە الدايدى.

     

    ءبىر ولەڭ جازباي كوسىلىپ قالاي جاتا الام،

    جەتكىزبەي باراد ارمانىم اناۋ قاشاعان.

    جازامىن ءبىر كۇن بويمدا بولىپ رۋحىم ،

    باۋرى بۇتىن حالقىمنىڭ بولسا باسى امان.

     

    ءبىر ولەڭ جازباي ومىردەن تەككە وتپەسپىن،

    ولەڭىم مەنىڭ جەلقابىز جۇيرىك كوك بەستىم .

    ءبىر ولەڭ جازام جۇرەگىن جۇرتتىڭ جىلتاتىن،

    دەپ بۇگىن مىنە جيىرما التىممەنەن سەرتتەستىم.

     

    分享到: