• 2012/08/15

    ينتەرنەتپەن مۇڭداسۋ ... - [ولەڭدەر]


    قىزۋى مول عۇمىردىڭ قىرقاسىندا ،
    قىرىق قابات قيالىم شىرىق اتۋدا.
    پەندە بولىپ كەلگەن سوڭ كەڭ دۇنيەگە
    كەۋدەنى توسەپ جۇرمىز بۇرقاسىنعا .

    بىرەۋدىڭ باعىن ۇرلاپ باسىنبادىم ،
    وندايدان اۋلاق ءازىر اسىل جانىم .
    تاس باتىپ تابانىما تاسىرقادىم ،
    جانىما جاقىنداماي جاقىندارىم .

    ەس ءبىلىپ ەتەك جەڭدى جيارىمدا ،
    سىندى ءومىر سىعىپ جاتىر سىناعىندا.
    اعايىننان الىستاپ اڭعال باسىم ،
    قوسىلدىم بەيتانىستاۋ ءبىر اعىنعا .

    كەش مەنىڭ قاتەلىگىم بولسا باسىم ،
    اۋىلدان الىس كەتتىم جول تاباتىن.
    مەن تۋرالى ايتىلعان اڭگىمەلەر
    قالا بەرسىن اۋىلدا قوي ساۋاتىن.

    قول سوزىپ اسقارلارعا  ۇمىتتەنىپ ،
    مەن جۇرمىن توبەشىكتى بيىك سەزىپ.
    اۋىلدا انام قالدى اق جاۋلىعى
    جەلبىرەپ، اق سامايى كۇمىستەلىپ.

    سول انامنان الا الماي ءبىر باتانى ،
    جۇرگىمدى ساعىنىش سىزداتادى.
    بۇيىعىلاۋ مىنەزىم بۇرا تارتىپ ،
    تەك قانا ينتەرنەتپەن مۇڭداسادى....

    分享到: